لو شاطر .. تعرف تعيش في مصر بـ 1000 جنيه في الشهر

لو
شاطر .. تعرف تعيش في مصر بـ 1000 جنيه في الشهر


- عيش بلدي : 1 جنيه يومياً = 30 جنيه شهرياً


(بس لازم تلحق دورك في
طابور الفرن وتلحق شغلك في نفس الوقت ربنا معاك )


-
حليب : 4 جنيه يومياً = 120 جنيه شهرياً


( عدد واحد لتر يومياً
ويا رب ميطلعش بودرة سيراميك ويكفى العيال )


-
فول : 8 جنيه أسبوعيا = 32 جنيه شهرياً( كيلو فول أسبوعيا يعنى 125 جرام يوميا رضا والحمد لله )


-
جبنة بيضاء : 20 جنيه أسبوعيا ً= 80 جنيه شهرياً( كيلو في الأسبوع 125 جرام يوميا أنت
عايش )


-
بيض : 5 جنيه أسبوعيا = 20 جنيه شهرياً


( عبارة عن 10 بيضات في الأسبوع
يعنى لو أربع أفراد يبقى بيضه ونص يومياً للأربعة أفراد )


-
خضار : 10 جنيه أسبوعيا = 40 جنيه شهرياً


( عبارة عن صنف واحد بس +
كيلو طماطم + ليمونه وحزمة جرجير أسبوعيا )


-
فاكهه : 5 جنيه أسبوعيا = 20 جنيه شهرياً


( عبارة عن كيلو برتقال
أو قشر موز مرة أسبوعيا عشان العيال تفتكر اسمه )


-
شاى : 10 جنيه شهرياً ( لزوم الكيف اللى
بيذل والضيوف الرزلين )


-
سكر : 4 جنيه أسبوعيا = 16 جنيه شهرياً


( عدد واحد كيلو أسبوعيا
.. لزوم الكيف اللى بيذل والضيوف اللى معندهمش دم )


-
أرز : 4 جنيه أسبوعيا = 16 جنيه شهرياً


( عدد واحد كيلو أسبوعيا
للعائلة كلها .. يعنى 125جرام يوميا للأسرة ومتوسط الفرد 40 جرام )


-
زيت طعام : 10 جنيه أسبوعيا = 40 جنيه شهرياً


( لتر أسبوعيا
علشان تشرب بق على الريق يزيت معدتك ويستعمل كبديل للخضروات )


-
مكرونة : 8 جنيه أسبوعيا = 32 جنيه شهرياً


( عبارة عن عدد 4 كيس 400
جرام أسبوعيا .. خلى العيال تنبسط )


-
دجاج : 20 جنيه أسبوعيا = 80 جنيه شهرياً( عدد واحد
دجاجة أسبوعيا للعائله .. أظن معقول )


-
لحم : 30 جنيه أسبوعيا = 120 جنيه شهرياً


( عدد واحد كيلو لحم
أسبوعيا لزوم صنف الخضار والليمونة وحزمة الجرجير.. ألف هنا وشفا )


-
بقوليات : 10 جنيه شهرياً


( عبارة عن كيلو واحد بس
شهريا ونقى اللى بتحبه براحتك .. عدس - لوبيا - فاصوليا )


-
توابل : 10 جنيه شهرياً(
عبارة عن دقيق + ملح + كمون + فلفل + كسبرة + وممكن تديها خل براحتك )


-
صابون : 15 جنيه شهرياً


( عبارة عن صابونه واحدة
للحمام + صابون مواعين + مسحوق للملابس ( النظافة عموما )


-
مواصلات : 2 جنيه يومياً = 60 جنيه شهرياً


( بعد طابور الفرن تركب
أتوبيس الهيئة ذهاب وعودة وبهدله لفرد واحد يوميا )


-
حلاق : 10 جنيه شهرياً


( عبارة عن حلاقة الشعر +
ماكينات حلاقة الذقن ( طبعا متنساش أنت جبت صابونه للحمام هى هى الصابونه اللى
هتحلق بيها دقنك بس اوعى تحلق ذقنك ( نعيما يا باشا )


- مصروفات مدرسية : 10 جنيه أسبوعيا = 40 جنيه
شهرياً


( عبارة عن مصروفات
المدرسة + مصروف العيال اليومي + كراسات وأقلام وجلاد ... إلخ )


-
دكتور : 30 جنيه شهرياً( نمرض
بالدور طبعا .. عدد أربعة أفراد × مرة واحدة للفرد كل 4 اشهر


-
أدوية : 50 جنيه شهرياً


( أكيد طبعا العلاج
بالدور وربنا يستر واثنين ما يمرضوش فى وقت واحد .. تبقى كارثة )


-
فاتورة التليفون : 10 جنيه شهرياً( اشتراك الهيئة فقط .. هنرد بس ومش هنتكلم .. ماعدش ينفع كلام
)


-
فاتورة المياه : 10 جنيه شهرياً( للأسف ده لو فلوسك على أدك ويبقى
لازم تشرب مياه ملوثة بالمجارى )


- فاتورة الغاز : 5 جنيه شهرياً


( الحمد لله .. غاز طبيعي
.. الله يكون فى عون اللي عنده أنابيب (10 جنيه للأنبوبة) وممكن تطلع فاضيه
)


- فاتورة الكهرباء : 20 جنيه شهرياً


( لمواكبة التطور .. غسالة
ملهاش مسحوق .. ثلاجة فاضيه .. بوتاجاز يستخدم مرة كل أسبوع )


-
قمامة : 10 جنيه شهرياً


( ودى إجباري طبعا
ومن الواضح إن العيشة دى ما فيهاش أكل أساساً .. يبقى القمامة هتيجى منين ؟
)


-
بواب : 15 جنيه شهرياً


( ما هو من حقه يعيش هو
كمان .. لو عشر شقق يبقى 150 جنية شهريا .. خليه يهيص )


-
صيانة : 30 جنيه شهرياً


( لإصلاح الأجهزة
بالدور .. غسالة - سخان - بوتاجاز - مروحة - ثلاجة - سباكة - لمبات إنارة ..
ا


-
ملابس : 100 جنيه شهرياً


( عبارة عن الصيفي والشتوي
داخلي وخارجي وأحذية وشرابات وكلونات واتصرف بقى )


الإجمـالى
: 1081 جنيه شهرياً


أكيد
اللى ها يخليك تعرف تعمل الكلام اللى فوق ده ها يخليك تتصرف وتضغط مصروفاتك شويه
علشان تبقى الحسبة 1000 جنيه بس .. أقولك نصيحة ؟ : ما تمرضش وما تخدش
أدوية وشيل 80 جنيه معلش ربنا يقويك وينصرك على من يعاديك ويكفيك شر المرض


وبالمناسبة ..
عيد الأم ربنا يخليها ويديها الصحة .. كل سنة وهى طيبة


عيد الكحك ..
مضر ومالهوش لازمة


عيد اللحمة ..
مضر ومالهوش لازمة


حلاوة المولد
.. السكر مضر ومالهوش برضه لازمة .. ولو على الحلويات رمضان كريم وخيره كتير


أخ خ
خ نسيت احسب زكاة الفطر بس مش عارف هادفعها ولا هاخدها ؟


عموما هاقولكم
على قائمة الممنوعات والمحظورات .. متقربوش منها علشان تعرفوا تتنيلوا
وتكملو الشهر


ممنوع .. الحلاوة والمربى والعسل
والزبدة وكافة أنواع الجبن عدا ما ذكر فى التعيين ( الجبنة البيضا )


ممنوع .. المعلبات .. تونه -
بلوبيف - لانشون - سالمون – فول - وطبعا البسطرمة والزيتون والمخللات


أوعى قلبك يحن لعيل من العيال
وتجيبله شيبسى ولا بيبسى أو كراتيه ونايتى ولاعسلية ولا بسكوت ولا شيكولاته
.. إياك ومنتجات العيال الصغيرين حتى لو حليب بالفواكه أو لبان وجيلى كولا وهوهوز
.. حتى الشيتوس يتفرج على الكرتون بتاعه فى التليفزيون ومتخليهوش يتفرج على الإعلانات
بين الفاصل


ممنوع اللحوم بانواعها ..
البوفتيك والاستيك والرقبة والموزة واللوزة كله كلام فاضى خليك فى تعيينك الاسبوعى
.. ومتنساش ان البانيه والفيليه من الممنوعات .. وماتقربش وماتمشيش فى الشارع جنب
كنتاكى وهاردييز وهاربيز وتكه ومؤمن وكوك دور .. وإياك من السندوتشات عموما زى
الطعمية والبطاطس والباذنجان والحاجات الحلوة دى مش مطلوبه تعملك حموضه وهتحتاج
فوار وإحنا ماعملناش حسابه فى مشتروات الدوا .. وطبعا مش محتاج أقولك وافكرك انك
ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ


خليك واقعي وانسى المحمر
والمشمر واللب والسودانى والتسالى بانوعها والمحمصات والمقرمشات والمكسرات
بأنواعها .. بالعربى أنت زى العصفورة تاكل عيش ودنيبة رز وتشرب ميه .. عمرك سمعت
عن عصفورة ركبت دش أو وصلت نت او حتى فكرت تاكل ترمس او تشرب حمص كله
كلام فاضى ممنوع ياسيد


اهم حاجة ما تروحش لدكتور
ومتجبش مدرس ولا أدوية وإياك من المعجنات زى البيتزا والفطائر ومش محتاج افكرك ان
البسبوسه والجلاش والكنافة والقطايف والجاتوة والشاتوة والتورت وام على وصوابع
زينب ورموش الست والكحك والغريبة ممكن تستغنى عنهم


طبيعي انك مش هتقرب من الفواكه
خالص زى البرقوق والمانجو والبطيخ والفراولة والكيوى والخوخ والعنب والتفاح حتى
الكاكا والحرنكش والنبأ والقصب والدوم والتوت ممنوع سيادتك


وطبعا معجون الأسنان
والحلاقة والشامبو والبلسم كلها رفاهيات ماليكش فيها زى البصل والتوم
والبطاطس كلها أساسيات ماليكش فيها برضه .. وماتنساش تبعت الميل للناس اللى تعرفهم
هما اكيد زيك محتاجين شوية نظام مش اكتر هما غلابة .. وفكرهم يقولوا لعيالهم لو
شافوا مسلسل في التليفزيون مليان بهرجه إن دى قصص خيالية كانت فى العصور القديمة
فترة من الزمن .. وإن الواقع زى ما هما شايفيينه دلوقتى .


حتى الإعلانات حاولوا تفهموهم
إنها مجرد ألوان مبهرة وتكنولوجيا في علم التصوير وتخيلات .. ممكن تحصل بعدين في
يوم ما .. زى ما حصل في أمريكا وكندا وفرنسا وألمانيا وأوروبا كلها .. وان الحاجات
دى علشان لما الناس دى ييجوا عندنا يلاقوا منها ويعرفوا يعيشوا .. وإن الحاجات دى
مش لينا .. دى ليهم هما .. هما أصحاب البلد ولازم ينبسطوا .


عموماً لو على الكلام ..
الكلام مش ها يخلص .. روح بقى الحق طابور العيش لايفوتك .. تبقى مصيبة لو انا اللى
عطلتك ورحت لقيت الفرن شطب .. وتقعد طول اليوم تدعى عليا .. واحنا مش
نقصين دعوات .. اللى فينا مكفينا .